Ishq Aur Bughz Ke Naam Par Dhoka | Deen Jazbaat Se Nahin, Qur'an Aur Sunnat Se Hai

Aaj daur e jadeed me Deen ke Naam par jo tamashe ,Khurafat aur be hayayi ke numaaish ho rahe hain wo sab "Ishq Aur Bughz Ke Naam Par Dhoka" ke siwa kuchh nahi.Hum Nabi ﷺ ke aashiq hain,unke Milad ka jashn manayenge,hum Ahl e bait ke manne wale hain,unke shahadat par gham manayenge. aur isi gham Aur ishq ke naam par shirk, Bidat aur be hayayi wale saare kaam ho Rahe Hain. 

Aaj bahut se log Deen ko Qur'an aur Sunnat ki bajaye apne jazbaat, muhabbat aur aqeedat ke zariye samajhne lage hain. Koi kisi buzurg ki muhabbat mein had se badh jata hai, koi Nabi ﷺ ki muhabbat mein Ghuloo kar baithta hai. Jab unhe Qur'an aur Sunnat ki taraf bulaya jata hai to ulta dawat dene walon par tanqeed ki jati hai.

Har Muhabbat Haq Ki Daleel Nahin Hoti

Haqeeqat ye hai ki Deen ishq se nahi, Allah ke ahkaam aur Nabi ﷺ ke farman se chalta hai. Ishq agar wahi hudood ke andar rahe jo Allah aur Rasool ﷺ ne muqarrar ki hain to ibadat hai, aur agar had se tajawuz kar jaye to gumrahi ka sabab ban sakta hai.

📖 Table of Contents(👆Touch Here) ▼

---

👉 Deen me Ghuloo Kya hai? Jane Yahan Deen me hadd se Aage Badhne ka anjam

Ishq Aur bughz ki Haqeeqat 

Allah Aur Allah ke Nabi ﷺ,Ahl e bait aur sahaba se beshaq ishq wa Mohabbat kijiye,ye iman ka hissa hai Lekin usi hadd tak jitna shariyat ne ijaazat di hai.

👉 Yaad rakhiye: Asal ishq Ya mohabbat Allah aur uske Nabi ﷺ ki ata'at me hai unki na-farmani me nahi.

♦️Lekin Aaj iski Haqeeqat ye hai ki Jo ishq ka dawa karne wale Hain wahi shirk , Bidat Aur Khurafat ke sabab ban Rahe Hain aur badhawa de Rahe Hain.iski misaal aaj Hamare aankhon ke samne hai Jo samaj me ho raha hai.

♦️jabki jinhe ye kahte Hain ki ye Nabi ﷺ aur unke nawase se bughz rakhte Hain wo to hamesha se in sab se bachne aur door rahne ki talqeen karte Hain.

To ab aap khud faisala kijiye ki asal me ishq karne Wale Kaun Hain Aur bughz rakhne wale Kaun Hain?

Har Muhabbat Haq Ki Daleel Nahin Hoti

Kisi ka kisi se muhabbat karna is baat ki daleel nahi ke uski har baat Ya koi deeni Amal sahi ho.

Misal ke taur par, kuch log Hazrat Ali R.a ki muhabbat mein unhe tamam Ambiya se afzal qarar dete hain. Ye baat woh bughz ki wajah se nahi, balke apni muhabbat aur aqeedat ki wajah se kehte hain. Lekin sirf muhabbat kisi aqeedah ko durust nahi bana deti.

Jab muhabbat Qur'an aur Sunnat ki hadon se nikal jaye to wahi muhabbat insaan ko ghuloo aur gumrahi tak le ja sakti hai.jo shirk ka darwazah kholti hai.

👉 Deen me jazbaat aur andhi aqeedat ki koi gunzaish nahi ,ye shariyat ki mukhalifat hai.zarur padhen ise 

Nabi ﷺ Ki Muhabbat Mein Bhi Ghuloo Se Bachna Zaroori Hai

Isi tarah kuch log Nabi ﷺ ki muhabbat mein aise aqeede ikhtiyar kar lete hain jo Qur'an aur Sahih Sunnat se sabit nahi hote. Misal ke taur par:

• Har Saal 12 Rabiul awwal ko unka jashn manana,juloos nikalna aur naach gane wa aatishbazi Karna.
• Nabi ﷺ ko har jagah hazir-o-nazir samajhna.
• Ye aqeedah rakhna ke Nabi ﷺ har majlis ya Jalse mein tashreef late hain.wagairah wagairah

Ya aise ikhtilafi aqeede jo daleel ke baghair muhabbat ki bunyaad par qaim kiye jate hain.

Ye sab aksar muhabbat ke jazbe se kiya jata hai, bughz ki wajah se nahi. Lekin niyyat achhi hone se har amal sahih nahi ho jata.

Allah Ta'ala farmata hai:

Agar tum Allah se muhabbat karte ho to meri pairwi karo, Allah tumse muhabbat karega.
(Surah Aal-e-Imran: 31)

Yani Allah ki muhabbat ka meyar Nabi ﷺ ki itaat hai, na ke apni taraf se naye aqeede aur tareeqe banana.

👉 Padhen Yahan muharram Aur taziyadari se Mutalliq maatam,taziya aur juloos ki Haqeeqat 

Qur'an Wa Sunnat Ki Tanqeed Kyun Hoti Hai?

Jab Ahle Qur'an wa Sunnat shirk, bid'at aur khurafat se rokte hain to aksar un par ilzam lagaya jata hai ke ye Ahl-e-Bait se bughz rakhte Hain, Nabi ﷺ se muhabbat nahi karte Hain.

Jabki Haqeeqat iska bilkul ulat hai.

Jo log shirk aur bid'at se rokte hain, woh Allah aur Uske Rasool ﷺ ki muhabbat hi ki wajah se rokte hain,bughz ki wajah se nahi, taake ummat shirk, Bidat aur gumrahi se bache Aur us raaste par chale jo Nabi ﷺ aur Sahaba R.a ka tha.

Unka maqsad kisi ki tauheen nahi, balke Deen ko usi asli surat mein pesh Karna Aur bachana hota hai.

Ishq Agar Daleel Se Khali Ho To Fitna Ban Jata Hai

Muhabbat ki bunyaad par agar har baat ko sahi maan liya jaye to phir duniya ka har firqa apne aqeede ko muhabbat ke naam par durust sabit karega.

Isliye Islam ne meyar jazbaat ko nahi, balke wahi ko banaya hai.

Qur'an Ka Faisla

Allah Ta'ala farmata hai:

Aaj maine tumhare liye tumhara Deen mukammal kar diya."
(Surah Al-Ma'idah: 3)

Jab Deen mukammal ho chuka hai to us mein apni muhabbat ki bunyaad par koi naya aqeedah ya ibadat shamil karna jaiz nahi.

Sahaba Ka Tareeqa

Sahaba-e-Kiram R.a Nabi ﷺ se sabse zyada muhabbat karte the. Lekin unhone kabhi bhi muhabbat ke naam par aisa aqeedah ya amal ikhtiyar nahi kiya jo Nabi ﷺ ne khud na sikhaya ho.

Yahi asal ishq hai:

• Sunnat ki pairwi.
• Allah ki itaat.
• Shirk aur bid'at se bachna.
• Qur'an aur Sahih Hadees ko har baat par tarjeeh dena.

👉 Eid Milad un Nabi ﷺ sunnat hai ya bidat, padhen Yahan Qur'an aur Hadees ki Roshni me 

Asal Mohabbat Kya Hai? Ek Aasaan Si Misaal

Ek chhoti si misaal se is baat ko samajhte hain.

Maan lijiye koi shakhs kehta hai: "Main apne walidain se bahut mohabbat karta hoon."

Ab sawal ye hai ki uski is mohabbat ki pehchan kya hogi?

Kya sirf zubaan se "main mohabbat karta hoon" keh dena kaafi hai?

Har giz nahin.

Agar waqai use apne walidain se sachchi mohabbat hai to woh unki jaiz baaton ko maane ga, unki ita'at karega, unka adab karega aur jaan-boojh kar unki nafarmani se bachega. Yahi sachchi mohabbat ki nishani hai.

Lekin agar koi har waqt ye da'wa karta rahe ke "main apne walidain se bahut mohabbat karta hoon", aur saath hi unki baat na maane, unki nafarmani kare aur apni marzi chalaye, to kya uska ye da'wa sachcha mana jayega?

Har aqlmand insaan kahega: Nahin. Ye mohabbat nahin, balki nafarmani hai.

Bilkul isi tarah Allah aur Uske Rasool ﷺ se mohabbat ka matlab sirf jazbati nare lagana ya da'we karna nahin hai. Asal mohabbat ye hai ke banda Allah ke ahkaam ko maane, Nabi ﷺ ki Sunnat ki pairwi kare aur un har baat se bache jisse Allah aur Uske Rasool ﷺ ne mana farmaya hai.

Agar koi muhabbat ka da'wa kare, lekin Qur'an aur Sunnat ke khilaf aqeede aur a'maal ikhtiyar kare, to ye muhabbat nahin, balki nafarmani hai.

Isi liye Allah Ta'ala ne farmaya:

"Agar tum Allah se muhabbat karte ho to meri pairwi karo, Allah tumse muhabbat karega."
(Surah Aal-e-Imran: 31)

Is ayat ne saaf kar diya ke Allah aur Uske Rasool ﷺ ki muhabbat ka meyar sirf ek hai: Ita'at (farmanbardari). Muhabbat kabhi bhi nafarmani ka naam nahin ho sakti.

Sahih Deen ko samjhen 

Allah ke liye sahih Deen ko samjhen aur awam ko "Ishq Aur bughz ke Naam Par Dhoka" na dijiye Aur na gumrah kijiye.Jo Sahi deen ko pesh kar rahe hain kam se kam unki baaton ko ghour se sune aur maqsad ko samjhen.ye aap ke dushman nahi hai balki khair khawah Hain Jo aap ko aur hamari aane wali naslon ko gumrahi se bachana chahte Hain.

Nabi ﷺ aur unke nawason se haqeeqi ishq ya mohabbat karne ka tareeqa Kya hai Khud samjhen aur apni aane wali naslon ki batayen. Yehi falah aur najaat ka raasta hai.

Nateejah

Aaj zarurat is baat ki hai ke hum apne jazbaat ko Qur'an aur Sunnat ke tarazu mein tolein.Ummat ko "Ishq Aur Bughz Ke Naam Par Dhoka" na de Aur na hi gumrah Karen.

Aakhir Nabi ﷺ Deen me aisi kaunsi kami chhor Gaye the jo aaj hum pura karne ki koshish kar rahe hain.

Jo Deen Nabi ﷺ hame de kar gaye the kya wo hamari nijaat ke liye kaafi nahi? Khud sochiye zara.

Har woh muhabbat jo Sunnat ke mutabiq ho, maqbool hai.Aur har woh muhabbat jo Ghuloo, shirk ya bid'at tak le jaye, chahe kitni hi jazbati kyun na ho, qabool nahi.

Yaad rakhiye:

Deen ishq se nahi chalta, Deen Allah ke ahkaam aur Nabi ﷺ ke farman se chalta hai.Asal muhabbat wahi hai jo itaat paida kare, na ke Ghuloo aur gumrahi.

👍🏽 ✍🏻 📩 📤 🔔

Like | Comment | Save | Share | Subscribe

By: Mohib Tahiri

islami Blogger:Is tarah ke aur islahi aur aakhirat se mutalliq mazameen ke liye hamari website visit karte rahein.”sahih deen dusron tak pahunchayen 

FAQs:

1. Kya sirf Nabi ﷺ ya Ahl-e-Bait se muhabbat karna najat ke liye kafi hai?

Nahin. Islam mein sirf muhabbat hi nahi, balki Qur'an aur Sahih Sunnat ki pairwi bhi zaroori hai. Asal muhabbat wahi hai jo itaat paida kare.

2. Islam mein Ghuloo (had se badhna) kise kehte hain?

Ghuluw ka matlab hai kisi shakhs ya cheez ki ta'zeem ya muhabbat mein itna had se badh jana ke Qur'an aur Sunnat ki hadood toot jayein.

3. Kya achhi niyyat har amal ko sahi bana deti hai?

Nahin. Kisi amal ke maqbool hone ke liye do shartein hain: ikhlas (Allah ke liye hona) aur Nabi ﷺ ki Sunnat ke mutabiq hona.

4. Ahle Qur'an wa Sunnat shirk aur bid'at se kyun rokte hain?

Isliye taake ummat Allah ki Tauheed aur Nabi ﷺ ki Sunnat par qayam rahe aur shirk, bid'at aur khurafat se mehfooz rahe.

5. Deen ka asal meyar kya hai?

Deen ka asal meyar Allah ki Kitab (Qur'an) aur Nabi ﷺ ki Sahih Sunnat hai, na ke jazbaat, riwayat ya kisi shakhs ki rai.

6. Kya har muhabbat sahi aqeedah ki daleel hoti hai?

Nahin. Agar muhabbat Qur'an aur Sunnat ke mutabiq ho to maqbool hai, lekin agar ghuluw tak le jaye to gumrahi ka sabab ban sakti hai.

7. Kya Nabi ﷺ se muhabbat iman ka hissa hai?

Ji haan. Nabi ﷺ se muhabbat iman ka hissa hai, lekin ye muhabbat unki itaat aur Sunnat ki pairwi ke sath honi chahiye.

8. Qur'an ke mutabiq Allah ki muhabbat hasil karne ka tareeqah kya hai?

Allah Ta'ala ne farmaya: "Agar tum Allah se muhabbat karte ho to meri pairwi karo, Allah tumse muhabbat karega." (Surah Aal-e-Imran: 31)

---