Oont ke Peshab Wali Hadees par Aitraaz ka Jawab – Haqeeqat kya hai?

Aaj kal social media aur debates me Islam par mukhtalif aitraaz uthaye jate hain. Unhi me se ek mashhoor aitraaz oont ke peshab (camel urine) wali hadees par bhi hota hai. Kuch gair-Muslim isay mazaak ka nishana banate hain, jabke kuch Musalman bhi confusion ka shikar ho jate hain.

Kabhi kabhi Islam ke kuch ahkaam ko samajhne me aksar logon ko mushkil pesh aati hai, khaaskar jab koi hadees zahiri taur par sakht mehsoos ho. Aisi hi ek riwayat Sahih al-Bukhari (Hadith #233) me milti hai, jise “Hadith-e-‘Ukl wa ‘Uraynah” kaha jata hai.

Is hadees ke hawale se aksar log 2 Tarah ke sawal uthate hain:

• 1. Kya isme oont ka peshab peene ka hukm diya gaya hai?
• 2. kya isme sakht saza ya qatl ka hukm hai?

✍️ By: Mohib Tahiri (Islahi Islamic Writer) | 🕋 Islam Par Aitraaz | Oont ke Peshab ki Haqeeqat | 🕰 Updated:17 Apr 2026

Oont ka Peshab Peene ki Haqeeqat 

To Aaiye Hum Is article "Oont ke Peshab Wali Hadees par Aitraaz ka Jawab" me in dono masle ko Qur’an, Hadees aur Ilmi Tahqeeq ki roshni me samjhenge — taake haq wazeh ho jaye.

📖 Table of Contents(👆Touch Here) ▼

---

Hadees ka Mukhtasar Mafhoom

👉 Kuch log Madinah aaye aur unki Sehat kharab ho gayi.
👉Nabi ﷺ ne unhe mashwara diya ke:

Tum log zakat ke oonton ke paas jao aur unka doodh aur peshab istemal karo (ilaj ke taur par).

Jab woh sehatmand ho gaye, to Baad me un logon ne jurm bhi kiya,

• Nabi ﷺ ke charwaha ko qatl kar diya
• Oont chura liye
• Islam se phir gaye (irtidad)
• Aur wahan se farar ho gaye

Baad me jab woh pakde gaye, to Nabi ﷺ ne unhein sakht saza di.

Oont ke Peshab aur Qatl se Mutalliq aage badhne se Pahle aaiye Pahle ye samjhen ki Islam paaki se Mutalliq Kya kahta hai?

---

👉 Islam Kya hai? Agar Aap ko Sach ki talaash hai to ise zarur padhen 

---

Islam me Taharat (Safai) ka Usool

Islam me safai aur paaki ko bunyadi ahmiyat di gayi hai. Nabi ﷺ ne farmaya:
👉 “Paaki aadha iman hai”(Sahih Muslin:223)

Is se yeh baat bilkul wazeh ho jati hai ke Islam ka mizaj taharat aur nazafat par mabni hai, aur aam tor par najasat (gandagi) se bachne ki taleem di jati hai. Yani deen ka asal rujhan hamesha safai, paaki aur pakizgi ki taraf hai.

---

🐐🐪 Bakri aur Oont ke Baade ka Mas’ala

Ek riwayat me Nabi ﷺ se poocha gaya:

“Kya bakriyon ke baade me namaz padh sakte hain?”
👉 Aap ﷺ ne farmaya: “Haan, padh lo.”

Phir poocha gaya:

“Kya oonton ke baade me namaz padh sakte hain?”
👉 Aap ﷺ ne farmaya: “Nahi.”
(Sahih Muslim: 360)

👉 Is se yeh baat samajh aati hai:

• Bakriyon ke baade me namaz padhna jaiz hai,
• jab ke oonton ke baade me namaz padhne se mana kiya gaya.

♦️Ulama ne is ki mukhtalif wajahen bayan ki hain, jaise:

• Oonton ke baade me gandagi zyada hoti hai
• Oont ka mizaj sakht aur bechain hota hai, jis se khushu‘ me khalal aa sakta hai
• Kuch riwayaat me oonton ko shayateen se mansoob kiya gaya hai (yani unki tabiyat me sakhti aur tundi hoti hai)

👉 Is liye wahan namaz se mana kiya gaya, taake paaki, sukoon aur khushu‘ barqarar rahe.

---

Ahem Nuqta

Isi bunyaad par yeh baat samajhni chahiye ke:

• Oont ke peshab ka zikr sirf ek khas ilaaji waqia me aaya hai
• Kahin bhi yeh nahi milta ke isay aam amal ya paaki ka zariya banaya gaya ho

📌 Note:
Ulama ke darmiyan is baat par ikhtilaf hai ke halal janwaron (jaise bakri, oont) ka peshab:

• Kuch ke nazdeek paak hai
• Aur kuch ke nazdeek halki najasat hai

👉 Lekin dono surat me yeh baat mutafiq hai ke Islam ka asal usool taharat aur safai hi hai, aur oont ke peshab ka mas’ala sirf ek specific context tak mehdood hai.

---

1.🐪 “Oont ke Peshab” wali Hadees par Aitraaz — Asal Haqeeqat Kya Hai?

Aksar log — chahe Muslim hon ya ghair-Muslim — is hadees ka sirf ek hissa uthate hain, aur sabse zyada jis baat par aitraaz kiya jata hai, woh hai:

👉 “Oont ke peshab peene ka mashwara”

“Sahih al-Bukhari me peshab peene ka zikr hai — yeh kaise mumkin hai?”

Isi nuqtay ko lekar shubha paida kiya jata hai.
Lekin is baat ko samajhne ke liye zaroori hai ke usay deen, tibb (medical science), aur pura context — teeno pehluon se dekhna Aur samajhna Zaroori hai.

---

👉 Kya Islam Talwar ki Zor se Phaila hai? Kya hai Haqeeqat Janne ke liye zarur padhen ise 

---

Hadees ka Context Samajhiye

Yeh log:

• Desert ke rehne wale the
• Madinah ka climate unke liye munasib nahi tha
• Shadeed bemari me mubtala ho gaye

👉 Is surat me Nabi ﷺ ne unhe ek temporary ilaaj bataya:
Oont ka doodh + peshab

📌 Yani:
👉 Yeh koi Sunnat ya religious ritual nahi tha
👉 Balki ek specific medical treatment tha

---

Kya Islam me Peshab Peena Jaiz Hai?

👉 Hargiz nahi!

Islam me:

• Najasat se bachne ka hukm hai
• Taharat bunyadi usool hai

📌 Nabi ﷺ ne hamesha safai aur paaki ki taleem di hai.

Sahih al-Bukhari Aur Muslim me hai:

Nabi ﷺ ne farmaya ke do logon ko qabr me azaab ho raha hai,un me se ek peshab se nahi bachta tha.

👉 Yahan Peshab se na bachne ki soorat me azab ho Raha hai. Jahan Peshab se na bachne par azab hai to bhala ye kaise ho Sakta hai ki Peshab peene ke liye ye Aam Hukm tha.

Note: Yahan insani peshab ki baat ho Rahi hai.kahne ka matlab hai ki Islam najasat se Paak rahne ki taleem de Raha hai warna iski wajah se sakht azab hai.

---

Ek Ahm Ghalat Fehmi

Kuch log kehte hain:
“Qur’an me mana nahi, to jaiz hai”

👉 Yeh approach bilkul ghalat hai.

Kyunki:

• Shari‘at sirf Qur'an se nahi
• Balki Qur’an + Hadees dono se banti hai

📌 Nabi ﷺ ne farmaya:

“Tumhe Qur’an aur uske saath us jaisi cheez (Hadees) di gayi hai”

👉 Is liye Hadees ko nazar andaz karna sahi manhaj nahi.

---

Zarurat me Rukhṣat ka Usool

Ab aaiye Qur’an ka ek bunyadi usool ko samajhte hain 

“Jo majboor ho jaye, us par koi gunah nahi”
(Surah Al-Baqarah 2:173)

👉 Iska matlab:

Agar jaan bachani ho Aur koi halal alternative na ho To haram cheez bhi temporary tor par jaiz ho sakti hai.

👉 Is hadees me bhi:

• Log beemar the
• Halat khaas thi
• Ilaaj bhi specific tha

Is Liye unhe us bimari se bachao ke liye aisa kaha Gaya aur Sirf unhi ko,kisi aur ne kabhi ye tareeqa nahi apnaya.

---

Kya Yeh Aam Ilaaj Hai?

👉 Bilkul nahi!

Ahm baatein:

• Nabi ﷺ ne har kisi ko yeh ilaaj nahi bataya
• Na hi isay aam sunnat banaya

📌 Iska matlab:
👉 Yeh ek case-specific medical prescription tha
👉 General rule nahi Jo Aam insan bhi ise istemaal kare.

---

“Kya Sirf Unhi Logon ke liye tha?”

👉 Yeh sabse strong dalil hai:

Agar yeh aam hukm hota:

• To tamam sahaba ko bataya jata
• Aur riwayat me aam hota

📌 Lekin aisa nahi hua, na hi Kisi sahaba se ye Amal saabit hai aur na hi Kisi hadees me aisa milta hai ki sahaba ne ispar Amal kiya.
👉 Is liye yeh khas halat ka ilaaj tha

---

 Kya Pehle se Maloom tha ke woh Murtad honge?

Is mas’ale me ulama ka ikhtilaf hai aur koi qat‘i daleel mojood nahi. Kuch kehte hain ke ho sakta hai Nabi ﷺ ko pehle se maloom ho, jab ke aksar ulama ke nazdeek is baat ko yaqeen ke saath kehna durust nahi.

Mo‘tadil raaye yeh hai ke Nabi ﷺ  kabhi zahiri halaat aur kabhi wahi ke mutabiq faisla farmate the, aur is waqia me saza unke baad ke sangin jurm (qatl, loot, baghawat) par di gayi aur wo bhi shariyat ke nafiz Qanoon ke mutabiq.

Qur'an ki Surah An-Najm (53:3-4) se yeh zaroor maloom hota hai ke Nabi ﷺ Apni Marzi se kuchh nahi kahte balki wahi ke mutabiq baat karte hain, lekin is se yeh qat‘i sabit nahi hota ke unhein is khaas waqia ka anjaam pehle se maloom tha.

👉 Is liye behtareen baat yeh hai ke is par final claim na kiya jaye aur kaha jaye: Wallahu A‘lam (Allah hi behtar jaanta hai)

---

Kya Yeh Hadees Waqai Mansookh Hai?

Kuch log kehte hain ke yeh hukm baad me mansookh ho gaya.

Lekin:
👉 Jamhur ulama ke nazdeek:

• Yeh saza Qur’ani hukm ke mutabiq thi
• Aur apni jagah barqarar hai

📌 Is liye ise mansookh kehna strong raaye nahi.

---

Ulama ka Mo‘tadil View

• Imam Nawawi
  👉 Yeh ilaaj zarurat aur khas halat ke liye tha

• Ibn Hajar al-Asqalani
  👉 Yeh case medical + legal dono pehlu rakhta hai
  👉 Isay aam hukm nahi samjha jayega

---

🧠 Simple Samajh (Real-Life Example)

Sochiye:

👉 Doctor kisi patient ko ek rare ya unusual medicine deta hai to Kya woh har insaan ke liye same hoga?
Jawab Hoga Nahi!

 Isi tarah Yeh bhi ek case-specific treatment tha

Agar:

Kisi dawa me alcohol ho Aur doctor kahe ke lena zaroori hai To kya woh hamesha haram rahega?
Nahi!

👉Kyunki Zarurat (necessity) ke tahat rule ko temporarily change kar deti hai

Islam ka nizaam:

💠 Safai (Taharat)
💠 Zarurat me aasani (Rukhṣat)
💠 Hikmat (Wisdom)

👉 Yeh hadees in teeno ka behtareen balance pesh karti hai

---

Aitraaz Karne Walon ke Aitraaz ka Jawab

Kuch log kehte hain: “Hindus gaay ka peshab peete hain aur Muslims oont ka” — lekin yeh ghalat Soch (false comparison) hai. Islam me oont ke peshab ka zikr sirf ek khas medical case me aata hai, jahan temporary ilaaj bataya gaya tha, jab ke dusre dharm me isay religious ya routine amal ke taur par dekha jata hai Jo gaay ka Peshab peete Hain.

📌 Islam ka bunyadi usool taharat (paaki) aur najasat se parhez hai. Isi liye Islam ne kabhi bhi peshab peene ko na Deen ka hissa banaya, na fazilat aur na hi aam amal. Yeh sirf zarurat ki surat me ek rukhṣat thi, na ke koi aqeeda ya rozmarra ki practice.

👉 Is liye dono cheezon ko ek jaisa samajhna durust nahi. Aaj tak kisi Muslim riwayat me yeh nahi milta ke log isay mazhabi ya riwaji amal ke taur par Oont ka Peshab peete hon ya apne upar chhidkaw karte hon. Islam ka mizaj hamesha hikmat, safai aur balance par mabni hai, na ke ghair-mantiqi riwayaat par.

---

🐪Conclusion:

Oont ke peshab wali hadees ko samajhne ke liye sabse pehli shart yeh hai ke usay poore context, ilm aur balance ke saath dekha jaye. Yeh baat bilkul wazeh hai ke Islam ne kabhi bhi peshab peene ko na ibadat banaya, na sunnat, aur na hi aam amal. Yeh sirf ek khas bemari aur khas halat me diya gaya temporary ilaaj tha, jahan zarurat ke usool ke tehat rukhṣat di gayi. Islam ka asal mizaj hamesha taharat (paaki) par mabni hai, is liye najasat se bachna hi bunyadi taleem hai.

Aaj ke daur me jab modern medicine maujood hai, to is cheez par amal karna na zaroori hai aur na hi recommended. Is liye jo log is mas’ale ko lekar aitraaz karte hain, unhein samajhna chahiye ke yeh koi general rule nahi, balki ek case-specific medical guidance thi. Deen ko samajhne ka sahi tareeqa yeh hai ke hum adhoori baat par faisla na karein, balki poori tasveer dekh kar ilm aur hikmat ke saath baat karein.

Oont ke peshab wali baat ko lekar jo aitraaz uthaye jate hain, woh tab paida hote hain jab:

• Context ignore kiya jata hai
• Sirf ek hissa uthaya jata hai

📌 Asal me:

• Yeh general hukm nahi
• Yeh temporary ilaaj tha
• Aur Islam ne kabhi isay aam sunnat nahi banaya

👉 Kaafir se murad kya hai aur asal me Kaafir kinko kaha gaya hai?agar Sach janna hai to zarur padhen ise 

*•┈━━━━•❄︎•❄︎•━━━━┈•*

2. Asal Sawal: Itni Sakht Saza Kyun?

Is waqia ko samajhne ke liye sabse aham baat yeh hai ke yeh koi mamooli jurm nahi tha. Balki in logon ne ek saath chaar sangin jurm kiye:

• Qatl (Murder)
• Chori (Loot)
• Irtidad (Islam chhor dena)
• Baghawat (State ke khilaf jang / fasad)

Islami Criminal law ke Tahat Mujrimo ko Saza 

👉 Is liye yeh sirf ilaaj ka mas’ala nahi, balki Islamic criminal law ka ek wazeh case hai.

---

Qur’an ki Roshni me Faisla

Allah Ta’ala Qur'an me farmata hai:

“Jo log Allah aur uske Rasool se jang karte hain aur zameen me fasad phailate hain, unki saza yeh hai ke unhein qatl kiya jaye, ya sooli di jaye, ya unke haath-pair ulte kaat diye jayein…”
👉 (Surah Al-Ma’idah 5:33)

📌 Is ayat me jo saza bayan hui hai, wahi is hadees me nafiz ki gayi.

---

Ulama ki Wazahat

Imam Nawawi

👉 Yeh saza unke jurm ki wajah se thi, sirf kufr ki wajah se nahi.

Ibn Hajar al-Asqalani

👉 Yeh log “Muharib” (baghi / dahshatgard) the, is liye un par hadd lagu hui.

Ibn Taymiyyah

👉 Yeh saza Qur’an ke hukm ke mutabiq thi aur insaaf ka taqaza thi.

---

Ghalat Fehmiyon ka Jawab

1. Kya Islam zalim hai?

👉 Nahi!
Islam me har saza insaf aur jurm ki shiddat ke mutabiq hoti hai.

2. Kya sirf Islam chhorne par saza di gayi?

👉 Bilkul nahi!
Is case me sirf irtidad nahi, balki:

• Qatl
• Loot
• Aur baghawat bhi shamil thi

3. Kya yeh aam logon ke liye hukum hai?

👉 Nahi!
Aisi saza sirf:

Islamic court
Aur hukmaran (ruler)
ke zariye hi nafiz hoti hai.

---

Aasan Misal (Simple Analogy)

Agar koi shakhs:

• Qatl kare
• Loot kare
• Aur state ke khilaf jang kare

👉 To duniya ke lagbhag har qanoon me uske liye sakht saza hoti hai.

---

Islam ka Insaafi Nizaam

Islam ka maqsad:

• Zulm ko rokna
• Muashray ko mehfooz rakhna
• Aur mujrim ko uske jurm ke mutabiq saza dena hai

👉 Yani Islam ka nizaam rahmat aur insaaf dono ka behtareen tawazun pesh karta hai.

---

👉 Kya Qur'an Allah ka kalaam hai ya Kisi insan ki likhi kitaab, Haqeeqat jaane Yahan 

---

Khaatma:

Is waqia me jo sakht saza di gayi, usay samajhne ke liye yeh yaad rakhna zaroori hai ke yeh koi aam jurm nahi tha. In logon ne qatl, loot, irtidad aur baghawat jaise sangin jurm ek saath kiye the, jo ke muashray ke aman aur nizaam ke liye bohot bada khatra the. Is liye jo saza di gayi, woh kisi zaati gusse ka natija nahi, balki Qur'an ke qanoon ke mutabiq ek insaaf par mabni faisla tha.

Yeh bhi samajhna zaroori hai ke aisi sazayein har shakhs khud se nafiz nahi kar sakta. Yeh sirf Islamic court aur hukmaran ke zariye hi di jati hain, jahan poori tahqiqat aur qanooni usool follow kiye jate hain. Is liye is waqia ko dekh kar Islam ko sakhti ya zulm se jorna ghalat hai — asal me yeh Islam ke insaaf, qanoon aur muashray ki hifazat ke nizaam ko wazeh karta hai.

👉 Yeh hadees kisi bhi tarah Oont ke Peshab peene ko na tarjeeh deti hai aur na hi zulm ki, balki: insaf, qanoon aur hikmat ka behtareen nizaam dikhati hai.

💡 Aakhir me:
👉 Deen ko samajhne ka sahi tareeqa yeh hai ke hum ilm, tawazun aur insaf ke saath baat karein — na ke sirf tanqeed ya ghalat fehmi par mabni rai qaim karein.

---

---

👍🏽 ✍🏻 📩 📤 🔔

Like | Comment | Save | Share | Subscribe

By:Mohib Tahiri

islami Blogger:Is tarah ke aur islahi aur aakhirat se mutalliq mazameen ke liye hamari website ‘Hidayat ki Roshni’ visit karte rahein.”sahih deen dusron tak pahunchayen 

---

FAQs:

Q1. Kya is hadees me zulm hai?
👉 Nahi. Yeh saza un logon ke sangin jurm (qatl, loot, baghawat) ki wajah se di gayi thi, jo Qur'an ke hukm ke mutabiq hai.

---

Q2. Kya sirf Islam chhorne (irtidad) par saza di gayi?
👉 Nahi. Is case me sirf irtidad nahi, balki:

• Qatl
• Loot
• Aur fasaad / baghawat

bhi shamil thi.

---

Q3. Kya oont ka peshab peena Islam me jaiz hai?
👉 Aam taur par nahi.
📌 Lekin zarurat (ilaaj) jaan bachane ki surat me, jab koi aur hal na ho, to temporary tor par ijazat ho sakti hai — jaisa ke is specific hadees me hua.

---

Q4. Kya yeh sunnat ya aam practice hai?
👉 Bilkul nahi.
📌 Yeh na to aam sunnat hai aur na hi general medical rule — balki ek khas case tha.

---

Q5. Kya yeh har bemari ka ilaaj hai?
👉 Nahi.
📌 Yeh sirf un logon ke liye ek specific treatment tha, har shakhs ya har bemari ke liye nahi.

---

Q6. Kya Islam me peshab peene ko promote kiya jata hai?
👉 Nahi.
📌 Islam me taharat (paaki) bunyadi usool hai, aur najasat se bachne ki taleem di gayi hai.

---

Q7. Kya yeh hadees sirf ilaaj ke bare me hai?
👉 Nahi.
📌 Yeh ek combined case hai jisme:

• Medical treatment
• Aur baad me criminal law (saza)

dono shamil hain.

---

Q8. Kya yeh saza har koi de sakta hai?
👉 Nahi.
📌 Aisi saza sirf:

• Islamic court
• Ya hukmaran (authority)

ke zariye hi di ja sakti hai.

---

Q9. Kya yeh saza aaj bhi lagu hoti hai?
👉 Haan, lekin sirf:

• Proper Islamic legal system
• Aur court ke zariye

📌 Aam log isay khud se nafiz nahi kar sakte.

---

Q10. Kya yeh hadees scientifically proven hai?
👉 Kuch research me is par baat hui hai, lekin:
📌 Yeh koi general ya recommended modern treatment nahi hai.

---

Q11. Kya is hadees par aitraaz sahi hai?
👉 Aitraaz tab paida hota hai jab:

• Context ignore kiya jaye
• Aur sirf ek hissa uthaya jaye

📌 Poora waqia samajhne se ghalat fehmiyan door ho jati hain.

---

Q12. Kya hadees ko reject karna sahi hai?
👉 Nahi.
📌 Sahih al-Bukhari jaisi authentic hadees deen ka aham hissa hain, aur Qur'an ke saath mil kar shari‘at ko mukammal karti hain.

---

Q13. Sabse important point kya hai?
👉 Context samjhe bina hadees par faisla na karein.
📌 Deen ko samajhne ke liye ilm, tawazun aur insaf zaroori hai.

---